ગુજરાત રાજ્યમાં કાયદો અને વ્યવસ્થાની પરિસ્થિતિ જળવાઈ રહે તે માટે દરેક જિલ્લામાં પોલીસ વિભાગ કડક કાર્યવાહી કરી રહી છે. જેના ભાગરૂપે ભરૂચ જિલ્લા એસપી ડો.લીના પાટીલે જિલ્લાના દરેક અધિકારીઓને ગેરકાયદેસરની પ્રવૃત્તિઓ ડામી દેવા આદેશ આપ્યા હતાં. જે અનુસંધાને ભરૂચ LCBના પીઆઈ ઉત્સવ બારોટની અંકલેશ્વર શહેરની ટીમ તેમના વિસ્તારમાંથી બાતમી મળી હતી કે, અંકલેશ્વર તાલુકાના નેશનલ હાઇવે નં 48 તીરંગા હોટલની પાછળ ઉછાલી ગામની સીમમાં હસમુખ મંજીભાઇ વડોદોરિયા (પટેલ)ના કબ્જા ભોગવટાના ફાર્મમાં આવેલા ઓરડીમાં ભારતીય બનાવટનો વિદેશી દારૂનો જથ્થો ઉતારી સંતાડી રાખ્યો હતો.
જે બાતમીના આધારે પોલીસે તાત્કાલીક એલ.સી.બી ટીમે બાતમીવાળી જગ્યાઓ ઉપર રેઇડ કરી ફાર્મમાં બનાવેલી ઓરડીમાંથી ભારતીય બનાવટના વિદેશી દારૂ તથા બીયરટીન નંગ 480 કિ.રૂ 48,000નો મુદ્દામાલ ઝડપી પાડયો હતો. પોલીસે સ્થળ પરથી બુટલેગર હસમુખ મંજીભાઇ વડોદોરિયા (પટેલ) (ઉં.વ 50) રહે, હાલ ઉછાલી ગામની સીમમાં આવેલા ફાર્મમાં ઉછાલી ગામ તા.અંકલેશ્વરને ઝડપી પાડ્યો હતો. જ્યારે સુનીલ ઉર્ફે રાજુ રહે,માંડવી જી-સુરતને વૉન્ટેડ જાહેર કરીને કાયદેસરની કાર્યવાહી હાથ ધરી છે.
